ROXAS CITY– Ginkumpirmar ni Roxas City Councilor Fernando Luis “Bords” Viterbo, nga isa sa mga prayoridad sang iya talatapan amo ang pagsolbar sang seryoso nga problema sa trapiko sa syudad, ilabi na gid ang illegal parking nga naga-harang sa mga gamay nga dalanon.
Sa interview sang Bombo Radyo kay Hon. Viterbo, Chairman sang Committee on Peace and Order, ginpahayag nga natalana nga i-update ang Comprehensive Traffic Code of Roxas City 2025 agud mas mapatuman sang maayo ang mga regulasyon sa parking, one-way schemes, kag iban pa nga ordinansa may kaangtanan sa trapiko.
Lakip sa mga tikang amo ang istrikto nga pagpahamtang sang towing, pagbutang sang clamping kag kontra illegal parking, sa bulig sang Traffic Management Unit (TMU) kag ni pila ka mga kaupdanan sa council.
Suno kay Viterbo, prayoridad sang ila nga talatapan ang proteksyon sang mga pedestrian kag estudyante nga nagagamit sang sidewalk adlaw-adlaw.
Nahibaluan nga nagpatawag sang meeting ang iya opisina kaupod ang City TMU, CORE, City Engineer’s Office, kag PNP agud masiguro ang epektibo nga operasyon. Lakip na diri ang plano nga paga-pintahan ang pedestrian lanes agud nga makita gid sang mga motorista.
Ginsambit man sini nga tinutuyo sang operasyon nga maghatag sang mas hapos kag accessible nga alagyan para sa mga estudyante kag pumuluyo samtang nagapatigayon na ang panibag-o nga school year.
Natalana naman sa masunod nga semana ang pagpatigayon sang clearing operations sang mga katapo sang Roxas City Government sa mga high-traffic areas, lakip na sa palibot sang mga eskwelahan sa syudad sang Roxas.
