ROXAS CITY – Arestado ang isa ka tricycle driver sa ginkasa nga drug buybust operation sang mga katapo sang Station Drug Enforcement Team sang Roxas City Police Station sa Barangay Dayao, Roxas City.
Ginkilala ang naaresto nga si Mariel Romero, 24 anyos, residente man sang nasambit nga lugar.
Sa interview sang Bombo Radyo kay Police Master Sergeant Ramil Arcangeles, tagpamaba sang Roxas City PNP, ginpahayag sini nga kalakip si Romero sa Directorate for Intelligence (DI) list sang pulisya.
Narekober sa suspek ang lima ka sachets sang shabu nga nagabalor sang P5, 000, isa ka cellphone, wallet, kag P1, 000 nga buybust money.
Hugot nga monitoring ang ginpatigayon sang pulisya sa suspek antes ginkinasa ang nasambit nga operasyon.
Sa karon, nakaaaresto na ang suspek kag natalana nga pasakaan sang panumbungon nga paglapas sa Republic Act 9165 ukon Comprehensive Dangerous Drugs Act of 2002.
