ROXAS CITY – Dakup ang isa ka tricycle driver matapos ang ginkasa nga drug buybust operation sang Station Drug Enforcement Team (SDET) – Roxas sa Barangay Banica, Roxas City , alas 5:01 kaina sang hapon.
Ginkilala ang nadakpan kay Marco Aponesto delos Angeles, 39-anyos residente sang Barangay Tiza, sini nga syudad.
Naaresto si delos Angeles pinaagi sa isa ka pulis nga nagpakuno-kuno nga poseur-buyer, isa ka sachet ang ginbaligya sang arestado sa baylo sang P3,500.
Nakuha sa paghinakup ni delos Angeles ang 1 ka sachet sang ginapatihan nga shabu nga may kabug-aton nga 13.6 grams kag may standard drug price nga P92, 480 kag 1 ka unit sang cellphone.
Sa karon, natalana ini nga pasakaan sang kaso nga paglapas sa RA 9165 ukon Comprehensive Dangerous Drugs Act of 2002 ang arestado samtang ginkustodiya sa Roxas Component City Police Station.
