ROXAS CITY – Natumod na ang tricycle nga nag-hit and run sa isa ka Ginang sa Sitio Paon, Barangay Cogon, Roxas City.
Matandaan nga na-capture sang CCTV ang pag-sideswipe sang tricycle sa biktima nga si alyas Phoebe, nagapang-edaron sang 65-anyos nga residente sang nasambit nga barangay.
Sa interview sang Bombo Radyo kay Punong Barangay Reynaldo Alparaque, ginpahayag sini nga ang driver sang tricycle kag ang mga sakay sini ang lunsay mga menor de edad kag mga residente sang Barangay Baybay, Roxas City.
Suno kay Alparaque base sa ila pagpangusisa, nagpangayaw sa paghampang sang basketball ang amo nga mga pamantan-on sa ila Barangay kag sang pagpauli na sang mga ini na-sideswipe sang ila tricycle ang nasambit nga Ginang nga nagalakat sa higad sang dalan.
Apang sa baylo nga magpundo kag balikdon ang biktima, madasig pa nga ginpadalagan sang driver ang tricycle.
Sa karon, yara na sa istable nga kondisyon ang Ginang kag suno kay Alparaque nag-settle na ang magtimbang nga bahin.
