ROXAS CITY – Daku nga bulig para sa ekonomiya kag turismo sang Vietnam ang natalana nga 2nd summit nanday US President Donald Trump kag North Korean leader Kim Jong Un.
Ini ang ginpahayag ni Bombo international correspondent Jun Felix, tumandok sang Caballero, Guimba, Nueva Ecija nga nabase karon sa Dong Da District, Hanoi City, Vietnam sa interview sang Bombo Radyo Roxas.
Suno kay Felix nga may maayo nga epekto ang natalana nga hinalaay sang duha ka lider humalin bwas, Pebrero 27 tubtob 28.
Suno sa iya nga ginalauman nga mas madamo pa nga turista ang mabutong sang Vietnam ilabi na nga sanday Trump kag Kim ang mga kilala nga mga maisog nga lider sa kalibutan.
Ginpahayag sini nga ang pangalan nanday Kim kag Trump ang mangin alagyan agud mapakilala pa ang Vietnam sa kalibutan.
Mahibaluan nga nag-abot na sa Vietnam si Kim sakay sa iya nga heavily armored train kun sa diin ginhatagan pa ini sang red carpet welcome.
Samtang, ginalauman naman nga magaabot si Trump karon sa gab-i sakay sang iya Air Force One.
