ROXAS CITY – Wala sang dapat kabalak-an ang mga pumuluyo sang Barangay San Jose, sining syudad bangud normal kag indi hazardous ang estado sang tubig sa sapa nga ginailigan sang water wastes gikan sa sanitary landfill sang siyudad sa Sitio Guimba sa nasambit nga barangay.
Suno kay Forester Vicente Losbanies, head sang Solid Waste Management Division sang Department of Environment and Natural Resources-Environmental Management Bureau (DENR-EMB) Region 6 nga sandig sa resulta sang water sampling analysis nga ginpatigayon sang amo nga ahensya sang tinalikdan nga Disyembre, nagaguha nga lunsay pasado sa standard sang water quality sang EMB ang tatlo ka mga sampling stations sa Guimba creek nga ginkuhaan sang sample apang aminado ini nga may deperensya ang tubig pag-abot sa iya duag.
Apang ginklaro ni Losabanies nga indi dapat pag-usaron for human consumption ang tubig gikan sa sapa.
Samtang sa pihak nga normal ang estado sang tubig sa Guimba creek, luyag ni Losbanies nga mahatagan ini sang aksyon sang gobyerno sang siyudad pinaagi sa pagpa-operate sang water treatment faciility agud indi magtuga sang water pollution sa sapa sa ulihi.
