Tumalagsahon nga saging nga sa sulod sang saha ang bunga, ginakabig nga ‘lucky charm’

ROXAS CITY – Ginkatingala sang madamo nga mga residente ang pagpamunga sang saging sa sulod mismo sang iya saha sa isa ka lote sa Hemingway St., sining syudad.
Suno kay Mrs. Malou Leonor Bajamonde, isa sa mga tag-iya sang Leonor property sa Hemingway St., kun sa diin nagtubo ang tumalagsahon nga saging nga alikonday, madugay na ang tanum nila nga mga saging sa lugar apang subong pa lamang natabo nga sa sulod mismo sang saha nahimo ang isa ka bulig nga bunga sini.
Apang aminado siya nga may isa man sadto ka puno sang saging sa lugar nga nagpamunga sang tuman ka dalagko nga bunga sang sa kinaandan nga bunga sang iban nga kaangay nga saging.
Ginpahayag pa ni Bajamonde nga nagapati ang iya mga kakilala nga nakakita sang nasambitan nga pinasahi nga puno sang saging nga isa ini ka ‘lucky charm’ kag swertehon man ang bisan sin-o nga mag-share sini sa social media.