-- ADVERTISEMENT --
ROXAS CITY, CAPIZ- Tuman nga kasadya ang nabatyagan ni Dave Vincent P. Alegre matapos nga nangin Top 3 sa ginpatigayon nga Certified Plant Mechanic Computer-Based Licensure Examination sang Agosto 2025.
Sa interview sang Bombo Radyo kay Alegre iya ginpahayag nga kaangay indi sya makapati sa nangin resulta sang amo nga exam. Suno sa iya, una niya ini nga nahibaluan pamaagi sa pagpanawag sang iya nga maestro sa diin ginhambal nga nakapasar sya sa amo nga exam.
Si Alegre, nga tumandok sang Barangay Ilaya, Ivisan, Capiz, nag-gradwar sa Capiz State University Main Campus sa kurso nga Bachelor of Science in Mechanical Engineering sang kapareho man nga tuig.
Dugang pa sini, una nya nga ginpakigbahinan sang maayo nga balita ang iya sini nga mga ginikanan sa diin nga tuman man ang kalipay matapos nahibaluan ang maayo nga balita.
Apang, sa pihak sang amo nga kadalag-an, may yara man sang mga pagtilaw nga naagyan si Alegre, sa diin amo ang pagpanimag-o sini sa sistema sang pagkuha sang exam, bangud nga computerized ang pamaagi sa pagsabat diri. Ginsiling pa sini nga maskin makapasar lang sya, ayos na, apang tuman ang iya nga kakibot bangud nakapasar na sya may bonus pa sa diin amo ang pagplastar nya sa Top 3.
Mensahe naman sini sa tanan nga nagahandom man nga makapasar sa amo nga exam, indi gid magkalipat sa pagpangamuyo sa mahal nga Dyos. I-ampo ang tanan nga handom kay sigurado gid nga ini ang pamatian.
Sa karon, nagapadayon sa pag-review si Alegre agud pagid nga mapasar ang 2026 Mechanical Engineering Licensure Examination sa masunod nga tuig.
In an interview with Bombo Daren Salomeo Henson
