ROXAS CITY, CAPIZ- Mixed emotion ang isa ka tumandok sang San Roque Street, Roxas City matapos ini nga nag-rank 10 sa November 2025 Philippine Nursing Licensure Examination.
Sa interview sang Bombo Radyo kay Francel Juliana Develos, Registered Nurse, nag-gradwar bilang Cum Laude sa St. Paul University Iloilo, iya ginpahayag nga wala siya nagdahom nga malab-ot ang amo nga kadalag-an kag kaangay ara siya sa gihapon nagalutaw sa mga panganod.
Suno kay Develos, indi nangin mahapos ang iya nga mga naagyan sang siya ang naga-eskwela pa lamang kag samantang naga-review para sa amo nga eksaminasyon. May mga bes nga nasubuan ini bangud sa kalayuon sang iya nga eskwelahan sa iya nga pamilya, apang nangin motibasyon niya ini agud nga magpadayon.
Pahayag niya, dako ang iya ang pagpasalamat labaw sa tanan sa mahal nga Diyos, sa iya nga ginikanan kag pamilya, sa iya mga kaabyanan kag sa tanan nga tawo nga nagasuporta sa iya.
Nagapanawagan naman ini sa mga opisyales sang gobyerno nga kuntani hatagan sang dako nga igtalupangod ang healthcare sector sang pungsod, bangud nga sandig sa iya nga mga obserbasyon, madamo gid nga mga pumuluyo ang nagakinahanglan.
Nahibaluan nga naggwa ang resulta sang amo nga pasinawan sang kaagahon sang Nobyembre 27, 2025.
Ginalauman sa subong ni Develos, ang mas dako pagid nga mga oportunidad para sa iya kag para sa serbisyo nga mahatag niya man sa mga tawo nga nagakinahanglan.
Interviewed by Bombo Sunnie Mae Constantino Batencila
