Nagsumiter sang ila Sworn List of Authorized Signatories ang United Bangsamoro Justice Party “UBJP”, sa Commission on Elections bilang pagsunod sa mga patakaran para sa una nga Bangsamoro Autonomous Region in Muslim Mindanao “BARMM”, parliamentary elections.
Ini suno sa Comelec Resolution No. 11216 nga nagarequire sa mga Regional Parliamentary Political Parties nga magsumiter sang listahan sang mga otorisado nga pirma kag ila specimen signatures antes sang Abril 30.
Ang gin-submit nga listahan sang UBJP nagalakip kanday Ahod Ebrahim nga amo ang presidente sang partido, Mohagher Iqbal bilang executive vice president, kag Matarul Estino bilang vice president. Personal nga gin-file ni Ebrahim ang dokumento sa law department sang Comelec.
Ginpahayag sang Comelec nga kun indi magsunod sa amo nga requirement, mahimo nga ideklarar nga independent candidates ang mga kandidato sang partido.
Samtang, ginpahayag ni Ebrahim nga makasaysayan ang masunod nga eleksyon kag handa sila nga magsunod sa tanan nga legal nga kinahanglanon.
Madumduman nga ginmanduan sang Comelec ang UBJP nga magsumiter sang sabat sa petisyon ni Sahabudin Panambulan Usop nga nagapangayo nga kanselahon ang ila accreditation. Gin-alegar sa petisyon nga nakalapas ang partido sa election gun ban kag nakabaton sang foreign funding.
Apang suno sa tagapamulong sang UBJP nga si Mohajirin Ali, nakasumiter na sila sang ila sabat kag wala ini makaapekto sa ila accreditation. Nagpasalig man siya nga magapadayon ang ila pagsalig sa resulta sang resolusyon sang Comelec.
