ROXAS CITY – Ginkumpirmar sang himata sang Grade 7 nga babayi nga residente sang Barangay Gabu-an, sini nga syudad, nga bangud sa rabies ang kinamatay sang amu nga estudyante.
Sa pagpakig-angut sang Bombo Radyo sa himata ni alyas ‘Nene’, ginsiling diri nga wala gid nila gin-ekspektar nga may rabies na sa lawas sang biktima bangud sa pagdumdom nga normal nga mataas nga lagnat ang ginbatyag sini sumugod sang Pebrero 14, apang ginbawian sang kabuhi sang Pebrero 16.
Ginpahayag pa diri nga wala makagat sang ila kaugalingon nga ido si alyas ‘Nene’ apang, sa ila madumduman nga sang Setyembre 2021, napatay na ang amu nga ido.
Nahibaluan nga may nauna nga nakagat ang ila hinuptan nga ido, apang natigayon nga mahatagan sang medikal nga atensyon ang ginkagat.
Wala ginlauman sang himata ni alyas ‘Nene’ nga posible napatay ang ila ido bangud may rabies ini kag matapos pa ang pila ka bulan sang nag-epekto ang virus sa lawas sini.
Aminado man ang pamilya sang biktima nga wala naturukan sang anti-rabies ang ila ido bangud gamay pa lang ini sang ila ginbakal.
Matandaan nga ginpahayag sang Provincial veterinarian nga si Dr. Leonel Abordo nga apisar wala direkta nga makagat sang ido ang biktima, apang bangud masami sini nga ginakugos kag gina-atipan, may posibilidad nga nalatnan ini sang ido nga may rabies, ilabi na kun nalawayan kag may ‘open wound’ ang nasambit nga persona.
