Nagsaka sa 6 percent ang unemployment rate ukon kadamuon sang mga wala obra sa Pilipinas sang Hulyo 2026, suno sa ulihi nga datos sang Philippine Statistics Authority ukon PSA.
Katumbas ini sa ginabulubanta nga 3.14 million ka Pilipino nga wala sang obra, mas mataas kumpara sa 2.59 million sang Hulyo 2025 kag 2.41 million sang Abril sini nga tuig.
Samtang, naglab-ot sa 49.21 million ang kadamuon sang mga may obra, samtang yara sa 12.9 percent ang underemployment rate. Ini amu ang mga tawo nga may obra apang nagapangita pa sang dugang nga oras ukon oportunidad para makatrabaho.
Pinakamataas naman ang unemployment rate sa National Capital Region ukon NCR nga yara sa 8.2 percent, nga ginsundan sang Bicol Region sa 8 percent.
Base ini sa July 2026 Labor Force Survey sang PSA nga ginpagwa subong nga Martes, Setyembre 8.
