Magatutok ang masunod nga House impeachment hearing sa ginaalegar Unexplained wealth kag isyu sa Statement of Assets, Liabilities, and Net Worth (SALN) ni Vice President Sara Duterte, kon sa diin ginmando ang pagpatawag kay Former Senator Antonio Trillanes IV kag pila ka mga ahensya sang gobyerno.
Suno kay House Committee on Justice Chairperson Gerville Luistro, nagpaguwa sang subpoena ang komitiba para kay Trillanes agud piliton ini nga magtambong sa hearing nga natalana sa Abril 22.
Nahibaluan nga si Trillanes ang ginakabig nga kabahin sang Saballa et al impeachment complaint partikular sa isyu sang Unexplained wealth ni VP Duterte.
Magluwas sa anay senador, ginkumpirma man ni Luistro nga may mga opisyal na gikan sa Anti-Money Laundering Council (AMLC) ang gin-imbita.
Ginalauman man ang pag-sumite sang mga dokumento may kaangtanan sa bank transactions sang mag-asawa nga Sara kag Manases Carpio.
Ang natalana nga pagsinapol sang komitiba ang magaserbe nga clarificatory hearing agud ma-athag ang mga alegasyon batok kay VP Duterte, lakip na ang ginpahayag indi kompleto nga deklarasyon sang iya mga assets kag manggad.
Samtang, gin-athag ni Luistro nga ginatugyan niya sa mga katapo sang komitiba ang pinal nga desisyon kon bala ipatawag si Ramil Madriaga, ang ginatawag nga self-proclaimed bagman, sa masunod nga mga imbestigasyon.
