Nagpabutyag sang kabalaka ang University of the Philippines (UP) Broadcasting Association sa bag-o lang nga desisyon ni Senate President Pro Tempore Loren Legarda nga mangin kabahin sang bag-o nga Senate majority bloc nga ginapangunahan ni Sen. Alan Peter Cayetano bilang Senate President.
Suno sa grupo, ang hinali nga political realignment nagapakita lamang kon ano kadasig ang pagbag-o sang mga loyalties sa gobyerno sang Pilipinas para sa political survival, convenience, kag elite bargaining.
Suno sa grupo, nagasangkad subong ang kahadlok kag kabalaka sang publiko nga ang pagbag-o sa liderato sang senado amo ang pagpaluya, pagpalawig, kag lubos nga pag-derail sang proseso sang impeachment.
Dugang pa sang grupo, ang political choice ni Legarda isa ka bukas nga pagpamatuk sa mga prinsipyo sang accountability, public service, kag democratic responsibility nga lunsay ginatudlo sa mga estudyante sang UP sa diin nagtuon si Legarda.
Bangud sini, ginhangkat sang grupo si Sen.Legarda nga paminsaron kag pamalandungan ang iya desisyon kag ang mga ‘values’ nga suno sa iya una niya nga ginatindugan.
Ginhangkat man sang grupo ang senador nga siguraduhon nga indi mangin palahuwayan sang ‘impunity’ ang Senado ukon mangin bargaining table sang mga political dynasties nga luyag magpabilin sa pwesto.
