Suportado sang University of the Philippines Manila ang pag offer sang ladderized nga kurso sang medisina sa Capiz State University.
Sa interview sang Bombo Radyo kay Dr. Efren Linan, President sang Capiz State University, iya ginpahayag nga ang ladderized medical program ang mangin daku nga bulig agud madugangan ang health professionals sa probinsya, ilabi na sa mga malayo nga barangay.
Suno sa iya, ang curriculum ang iga-design sang UP Manila samtang ang mga manunudlo nga halin sa CAPSU ang ipaidalom sa training sang nasambit nga unibersidad agud masiguro nga pareho ang kalidad sang edukasyon.
Samtang, nagpakig hinun-anon man sila sa provincial government, nga maga-alokar sang pondo nga magabulig sa infrastructure kag dugang nga kagamitan.
Pahayag pa niya, ang ladderized program magsugod sa 2-year midwifery course, nga may community service requirement antes maka-padayon ang estudyante sa nursing.
Luyag sang CAPSU nga masuguran ang admission subong nga tuig, apang ginahulat ang pormal nga approval sang Commission on Higher Education (CHED).
Ginpasalig ni Dr. Linan nga mangin libre ang pag-eskwela paagi sa mga scholarship grant sang Gobyerno Probinsyal kag sang distrito, agud ang mga indigent nga estudyante ang makabenepisyo.
