ROXAS CITY – Balantayan sa karun ang nagahilapit nga Unlimited seafoods sa Panginhas Festival sa Barangay Buntod, Panay Capiz, sa Hunyo 22, 2023 Huwebes nga adlaw.
Sa interview sang Bombo Radyo kay Punong Barangay Felipe Base sang Barangay Buntod, Panay Capiz ginpahayag sini ginpreparahan sang ila barangay ang nasambit nga selebrasyon.
Suno kay Base, mahimo nga ma-enjoy ang ila unlimited seafoods kun sa diin may yara ini nga P200.00 nga entrance fee nga magasugod alas 11:00 sang aga, pila sa mga seafoods ang ila ginpreparar amu ang tahong, talaba, litub, tuway, bagongon, scallops, alimango, pasayan, nagkalain-lain nga mga isda kag madamo pa.
Magluwas diri may yara man sila nga pagahiwaton nga fluvial parade kun sa diin mahimo nga ma-eksperyensyahan ang malamig nga tubig sang ila baybayon.
Ang nasambit nga fiesta ang kadungan sang nagahilapit man nga kapistahan sang San Juan Bautista.
Dugang pa ni base nga ini ang labing una nga kahigayunan nga ma-eksperyensya sang ila barangay ang amu nga okasyon.
Bangud sini dako gid ang iya pagpasalamat sa tanan nga mga pumuluyo sang ila barangay bangud sa ginhatag nga suporta kag kooperasyon agud matigayon ang amu nga hiliwaton.
Preparado naman suno diri ang ila pila ka mga opisyal kadungan sang palaabuton nga fiesta nga magabulig agud mapabilin nga malinong, masadya kag matawhay ang ila pagselebrar.
Mensahe ni Base sa tanan nga magtambong kag saksihan ang ila fiesta sa nasambit nga adlaw kag fiesta bangud suno diri, makabig ini nga isa sa mga indi malipatan sang tanan kag nagalaum nga malakip sa kasaysayan indi lamang sa probinsya kundi sa bug-os nga Pilipinas.
