Mahimu na nga maagyan ang dalan sa may bahin sang Barangay Cabugao, banwa Ivisan kun sa diin natabo ang landslide.
Matandaan nga sang nakaligad nga semana nagluntad ang landslide sa lugar bangud sa wala untat nga pag-inulan.
Dalagko nga mga bato ang natiphag kag nagharang sa alagyan, dugang pa ang lapuk kag mga kahoy nga halin sa ibabaw.
Natinguhaan man nga mabuligan kag malimpyuhan ang alagyan bangud sa pagpanikasog ni Ivisan Mayor Felipe Neri Yap, sa pagpangayo sang bulig kay Governor Fredenil Castro nga nagpadala sang heavy equipment agud amo ang magkuha sang mga dalagko nga mga bato nga nagtabon sa karsada sa nasambit nga barangay.
Sa karon, panugyan sang alkalde sang banwa nga maghalong kag mag-aligmat sa tion nga may kalamidad agud malikawan ang ano man nga insidente ilabi na sa mga lugar nga delikado, kag ginapasiguro man ang kaluwasan sang mga residente nga yara sa lugar.
