ROXAS CITY – Nagapadayon ang imbestigasyon sang mga otoridad sa gintunaan sang kamatayon sang wala pa makilala nga biktima matapos ginapahayag ginluthang antes masunog sa sulod sang kaugalingon nga salakyan duag itom nga may plate number XAM 778 sa Mabini corner Mejorada, Barangay Inzo Village, Arnaldo Roxas City subong nga hapon.
Sa pagpakig-angut sang Bombo Radyo kay Shift Supervisor Diovie Nieves sang BFP-Roxas City, ginsiling sini nga indi pa matul-id sa karon kun ano ang gintunaan sang pagdaba-daba sang salakyan kag pagkasunog sang driver.
Posible bangud sa pagkabunggo sa pader, ukon ginhabuyan sang gasolina ang amu nga salakyan rason sang pagkasunog sini.
Ba-se naman sa panaysayon ni TMU personnel George Aguil, samtang naga-roving sa amu nga dalan, nakit-an sini ang biktima sa sulod sang salakyan nga naga-asu.
Gilayon man ini nga nagtawag sa BFP-Roxas City kag RCERT para sa pagresponde apang ginabulubanta 10 minutos ang nakaligad nagdaba-daba na ang nasambit nga salakyan.
Suno naman kay Barangay Kagawad Ervin Sicad, nakabati sila sang duha ka beses nga paglupok kadungan sang report nga may salakyan nga naga-asu kag nasaksihan sini ang makahalanusbo nga gindangatan sang biktima nga amat-amat ginalamon sang kalayo.
Sa karon, gindala na sa isa ka punerarya ang bangkay sang biktima.
Samtang nagapadayon naman ang imbestigasyon sang Scene of the Crime Operation (SOCO) angut sa insidente kag padayon nga ginahibalo ang pagkakilanlan sang biktima.
