JAMINDAN CAPIZ- Napasakaan na sang kaso ang duha ka mga imbolbado nga sibilyan sa kinagamo batuk sa mga kapulisan sa banwa sang Jamindan.
Matandaan nga ginkilala ang duha ka opisyal nga sanday PSSg. Ezequias Villeza kag PCpl Apolonio Llait samtang ang duha ka sibilyan amo nanday alyas “Joe” 24-anyos kag alyas “Mark”, 22-anyos, lunsay residente sang Barangay Esperanza sa amu nga banwa.
Sa interview sang Bombo Radyo kay PLT. Liberato Cagampang Jr. hepe sang Jamindan MPS, ginpahayag nga natigayon na nga mafile kagahapon nga adlaw Enero 2, 2025 ang kaso sang duha ka sibilyan.
Mahibaluan nga sang natabo ang insidente ,nagapatrolya ang mga kapulisan kadungan sa pagsug-alaw sang Bag-ong Tuig sa plaza sa banwa sang Jamindan, aksidente ini nga nasanggit sang isa ka motorsiklo sakay sang duha ka nasambit nga sibilyan.
Suno kay Cagampang, gin-imbitaran sang duha ka duty personnel ang mga ini sa police station apang nagbato kag amo ang gintunaan sang kinagamo sa tunga sang mga pulis kag sang mga ini.
Dugang pa sang hepe base sa imbestigasyon wala sini nakita nga paglapas sa layi nga ginhimo ang duha ka personnel kundi gintindugan lang sini ang ila pagkapulis.
Samtang, tatlo ka kaso ang ginapangatubang sang driver sang motorsiklo nga reckless imprudence resulting to physical injuries kag pareho nila nga ginapangatubang amo ang direct assault kag resisting arrest.
Sa karon, nakahunong sa karsel sang Jamindan Municipal Police Station ang nasambit nga mga sibilyan para sa nagakaigo nga disposisyon.
