ROXAS CITY – Nagpadulong sa isa ka punerarya ang pamilya Fria matapos nga nabalitaan ang kamatayon sang isa ka lalaki nga ginapahayag ginluthang antes masunog ang salakyan sa Mabini corner Mejorada, Brgy. Inzo Village, Arnaldo Roxas City.
Sa pagpakig-angut sang Bombo Radyo kay Michael Fidalgo, ginkumpirmar sini nga ang Pajero nga salakyan may plate number XAM 778 ang ginapanag-iyahan sang iya tiyo nga yara na sa karon sa pungsod Sweden, apang ginagamit sang iya pakaisa nga si John Fria, 27-anyos, soltero kag residente sang Brgy. Pinamalatican, Sigma, Capiz apang temporaryo nga nagapuyo sa San Roque St, sini nga syudad.
Suno diri, matapos nabatian ang balita, gilayon nga ginpadulongan ni Fidalgo ang balay ni Fria apang wala sang tawo ang balay sini.
Nahibaluan nga si Fria lamang ang nagagamit sang nasambit nga salakyan, kag indi man sini huyog nga magpahulam sang salakyan sa iban nga tawo ukon abyan.
Ginatinguhaan man ini nga makontak apang tubtob sa karon wala pa sa gihapon ini nagasabat.
Pahayag ni Fidalgo, mabudlay makilala ang bangkay sang biktima bangud sa sunog nga nawong kag lawas.
Apang, wala man niya ginadula ang posibilidad nga amu ini si John Fria bangud sa panglawason kag ngipon sang biktima.
Nagalaum man si Fidalgo, nga yara lang sa hilway nga sitwasyon si Fria kag kabaliskaran lang sang iya napanumdom.
Sa karon, padayon nga ginapangita ni Fidalgo soi Fria samtang padayon nga ginahibalo pa sang otoridad ang matuod nga pagkakilanlan sang biktima.
