ROXAS CITY – Handa ang ginatudlo upline sang double your money investment scam sa Barangay Libas, sini nga syudad nga itudlo ang apartment nga nagserbe ‘meeting place’ nila sang CEO nga si Josephine Astra Ramos.
Sa interview sang Bombo Radyo kay Anna Mae Barroa, ginpanindugan sini sa gihapon nga wala sa iya mga kamot ang minilyon nga kuwarta agud pay-out kuntani sang mga investors, kundi yara kay Josephine Astra Ramos nga nagpakilala taga probinsya sang Capiz, kag nagapuyo sa bahin sang Homesite, Barangay Lawaan, Roxas City.
Nagpangayo man ini sang pasaylo sa pamilya sang kapangalan ni ‘Josephine Ramos’ bangud naulamid ini sa isyu.
Matandaan nga sini gid lamang ginhingadlan ni Barroa ang middle name ni Josephine, rason nga ang himata sang kapangalan ni Ramos nga taga Barangay Banica, ang naalarma bangud madamo ang nagpadulong sa ila balay.
Pagaatubangon naman ni Barroa ang mangin kabayaran sang iya nahimo nga kasaypanan apang ginpanindugan sini nga biktima man ini ni alyas ‘Josephine Ramos.’
