Ginkumpirma sang Philippine Coast Guard (PCG) ang presensya sang duha ka mga panggyera nga barko sang Estados Unidos sa kalayuon nga 30 nautical miles halin sa Panatag (Scarborough) Shoal.
Ang USS Higgins (DDG-76), isa ka guided-missile destroyer, kag ang USS Cincinnati (LCS-20), isa ka littoral combat ship, ang namonitor sa lugar pila ka-adlaw matapos ang bungguanay sang duha ka barko sang China sa kalalawran nga sakop sang Pilipinas.
Suno kay Commodore Jay Tarriela, tigpamaba sang PCG para sa West Philippine Sea, ang presensiya sang mga barko sang US ang natabo kasunod sang insidente sang Agosto 11 kun sa diin ang China Coast Guard (CCG) vessel nga may hull number 3104 ang bumonggo sa isa ka barko nga panggyera sang People’s Liberation Army Navy (PLAN) samtang ginalagas ang barko sang PCG nga BRP Suluan.
Sa report sang PCG, nagpatigayon sang delikado nga maniobra ang CCG vessel nga nangin rason sang bungguanay.
Dako ang damage sa unahan sang barko sang China, samtang nakalikaw naman ang BRP Suluan sa insidente.
Nahibaluan nga ang Panatag Shoal, kilala man bilang Bajo de Masinloc, isa ka bahura nga makit-an sa sulod sang 200-nautical mile Exclusive Economic Zone (EEZ) sang Pilipinas.
Apisar madugay na nga kabahin sang tradisyunal nga pagpangisda sang mga Pilipino, ginaangkon man ini sang China kag padayon nga ginabantayan sang ila nga coast guard kag navy.
Sang 2012, nag-umpisa ang tensyon sa lugar sang may nagluntad nga standoff sa tunga sang Pilipinas kag China, nga nagresulta sa de facto control sang China sa bahura.
Ang pag-abot sang mga barko nga panggyera sang US ang kabahin sang mas malapad nga estratehiya sang Washington agud nga ipakita ang suporta sa mga kaalyado sini sa Indo-Pacific, kalakip ang Pilipinas.
Sa idalom sang Mutual Defense Treaty sang 1951, may obligasyon ang Estados Unidos nga mag-aksyon sa mga armado nga pag-atake batok sa mga pampubliko nga barko sang Pilipinas sa Pacific.
Apisar indi direkta nga nagapanghilabot ang US sa mga territorial dispute, ang ila nga presensiya ang ginkabig nga mensahe sang pagpabilin sang kahilwayan sa pagpalayag kag pagrespeto sa international law.
Padayon nga nagapanindugan ang Pilipinas sa kinamatarong sini sa kalalawran, base sa 2016 arbitral ruling nga nagpabor sa pungsod kag nagpaimbalido sa malapad nga nine-dash line claim sang China.
Sa pihak sang mga insidente sang pagpang-harass sa mga manugpangisda nga Pilipino, nagapabilin nga aktibo ang PCG sa paghatag-proteksyon kag pagmonitor sa mga aktibidad sa West Philippine Sea.
