ROXAS CITY – Nagtan-ay sang fuel subsidy ang Uswag Ilonggo Party List sa mga pili nga tricycle drivers kag operators nga ginhiwat sa Don Ynocencio Del Rosario Gym, Barangay Dayao Roxas City subong nga adlaw.
Nangin dinapit nga bisita sa amu nga aktibidad sanday Roxas City Mayor Ronnie Dadivas, Joanne Dadivas Cong. Jojo Ang, Hepe sang Tricycle Franchising and Regulatory Unit (TFRU) Mr. Edgar Andrade, City Councilor John Paul Baticados, Paolo Roxas kag Punong Barangay sang Barangay Dayao nga si Winnie Batuampo.
Mahibaluan nga 1,000 nga mga tricycle drivers kag operators ang makaganar sang tig-P1,000.00.
Kinahanglan lamang nila sini nga magpresentar sang certificate of indigency, pormas nga nagikan sa Department of Social Welfare and Development (DSWD), kag duha ka photocopy sang driver’s license.
Sa interview sang Bombo Radyo kay Tatay Ramon isa sa mga nahatagan sang subsidiya, ginsiling sini nga dako nga bulig para sa iya ang P1,000.00 bangud makabakal ini sang bugas kag sud-an para sa iya pamilya.
Suno kay Tatay Ramon, indi bastante ang iya ginakita sa pagpamasahero nga P700.00 kada adlaw ilabi na sa subong nga tyempo nga tuman ka mahal sang gasolina ikumparar sadtong una.
Bangud sini, dako ang iya pagpasalamat sa nagpanikasog sa nasambit nga aktibidad nga mahatagan sila sang pagtamud nga mga tricycle drivers kag operators.
