PANAY CAPIZ – Nagapati ang utod sang manugbantay sang Punong nga nalumos patay sa banwa sang Panay nga wala sang foul play sa natabo kag aksidente lamang.
Matandaan nga ginkilala ang biktima kay alyas “Melvin”, 37-anyos kag residente sang Sitio Hilario, Barangay Agbanog, Pontevedra, Capiz.
Sa interview sang Bombo Radyo sa imbestigador sang Panay PNP nga si PSSG. Jesan Cantojos ginpahayag sini nga ini ang base sa panaysayon sang utod sang biktima sang ila napakig-angutan.
Suno kay Cantojos, nga antes natabo ang insidente magka-upod nga nag-inum ang mag-utod sadtong Agusto 29, 2024 kag nakapauli alas 2:00 na sang kaaganhon Agusto 30, 2024.
Mahibaluan nga separar nga nagpauli ang mga ini kung sa diin nagsakay pa sang baruto ang biktima agud kun tani magbalik sa punong kag mag-obra.
Ginaalegar nga nagsangit ang baruto sini kabangdanan sang iya pagkahulog sa tubig.
Ginsiling pa sang imbestigador nga may pilas sa tuo nga bahin sang kilay ang biktima kag bibig.
Panugyan sini sa pumuluyo nga magpabilin sang reserba sa pagauli ilabi na kun magabyahe pa agud malikawan ang kaangay sini nga insidente.
