IBAJAY, AKLAN – Gindeklara nga patay si Vice Mayor Julio Estolloso sang Ibajay, Aklan matapos ginluthang ni Sangguniang Bayan Member Mihrel Senatin sa sulod mismo sang Ibajay Session Hall subong nga adlaw.
Suno sa kapulisan, nakaangkon sang gunshot wound sa nawala nga dughan ang bise alkalde.
Gilayon man nga gin-aresto si Senatin kag yara na sa kustodiya sang Ibajay Municipal Police Station.
Pahayag sang Ibajay PNP, nagsulod si Senatin sa opisina kag namangkot sa staff member sang tanan nga kopya sang ordinansa nga ginpasar sini sa iya nga termino.
Gilayon man niya nga ginpalapitan si Vice Mayor Estolloso kag ginpamangkot, “Vice, anu ang saea kimu?” (“Vice, ano problema mo sa akon?”) antes niya gintiro ang bise alkalde.
Base sa panaysayon sang Ibajay PNP, indi nila makit-an ang anggulo sa pulitika bangud kaangay man lang sang partido ang bise alkalde kag SB Member.
Wala man sang may naglab-ot nga report sa ila nga may yara sang personal nga away ang duha.
Sa subong, padayon pa nga ginapadalman sang kapulisan ang natabo nga pagpangluthang.
