Nangin madinalag-on ang 12th Visayas ICT Organization VICTOR Conference 2024 nga ginhiwat sa Roxas City humalin Agosto 29 tubtob 31, 2024.
Sa interview sang Bombo Radyo kay Roxas City Councilor Victor Federico Acepcion, gintuad sini nga manami ang feedback sang yara sa masobra 200 nga mga partisipante nga nagikan sa ICT Industry sa Region 6, 7 kag 8 nga nagpakigbahin sa amo nga conference.
Suno kay Councilor Acepcion nga ginhinalaan sa conference ang talent development nga importante gid agud makaganyat sa mga investors, kalakip na ang Artificial Intelligence kag development sang bag-o nga technology nga makabulig sa aqua culture kag agriculture, subong man ang mga proyekto sang mga LGU’s sa pagpasangkad sang IT Industry kag BPO’s.
Dugang pa sini nga posible may maga-invest sa Capiz bangud nakit-an sang mga bisita ang matawhay ang lugar kag manami nga akomodasyon sang mga tawo nga healthy para sa isa ka negosyo.
Nagpasalamat naman si Acepcion sa kooperasyon sang mga LGUs sang syudad kag probinsya bangud nangin madinalag-on ang nasambit nga conference.
