Patay ang isa ka content creator nga ginkilala kay Emma Amit matapos magkaon sang devil crab sa ila barangay sa Puerto Princesa.
Suno sa report, sang Pebrero 6, ginluto ni Amit ang alimango nga nadakpan sang iya asawa para sa ila vlogging content samtang nagakaon.
Ginpahayag sang Kapitan sang Barangay Luzviminda nga si Laddy Gemang nga gin-share pa ni Amit ang pagkaon sa iya abyan.
Ang abyan ni Amit nakabatyag sang pagkamanhid ka nag-untat sila sa pagkaon, apang si Amit nagpadayon. Matapos magkaon, nabudlayan ini sa pagginhawa kag gindala sa clinic antes gindala sa ospital, sa diin gindeklarar nga dead on arrival ang vlogger.
Suno kay Prof. Deo Florence Onda sang UP Marine Science Institute, ang devil crab mismo ang wala naga-produce sang hilo, kundi naga-develop ini sang toxin halin sa microorganisms sa reef nga ginakaon sang crab.
Ang neurotoxin gikan sa sini mahimo nga makatuga sang pagkaparalisado kag madasig nga mga epekto depende sa kadamuon sang hilo.
Nagpaandam ang Bureau of Fisheries and Aquatic Resources (BFAR) MIMAROPA nga indi tanan nga colorful crabs safe kaunon, lakip na ang devil crab kag green egg crab. Bisan pa lutuon ukon ginluto, ang hilo nagapabilin nga mahimo tunaan sang pagkamanhid, kaluya, kag pagkaparalisado sang pagginhawa.
Nahibaluan nga ini na ang ikatatlo nga napatay sa barangay bangud sa pagkaon sang devil crab suno sa kapitan.
