CAPIZ – Pagatutukan sang Commission on Election (COMELEC) Capiz ang posible matabo nga vote buying ukon vote selling sa probinsya sa tion sang eleksyon.
Sa ginpatigayon nga paghinun-anon sa PIA KAPIHAN Episode 31, may kaangtanan sa 2025 Midterm Elections Updates with COMELEC and Phil. Army 12th Infantry Battalion, ginsiling sang Provincial Election Supervisor sang Comelec Capiz nga si Atty. Salud Milagros Villanueva nga hugot nga bantayan sang ahensya ang pag-abot sa vote buying ukon vote selling pinaagi sa pagtukod sang Committe on Kontra Bigay.
Suno diri nga sa tion may mapagkit ang ila nga talatapan sang kasubong sini nga insidente, posible nga ang mga kalakip nga indibidwal sa likod sang aktibidad mahatagan sang nagakaigo nga aksyon.
Ginpaanggid sini nga pananglitan ang isa ka kandidato nga nagbakal sang boto, mahimo nga madisqualify kag magaresulta sa pagkapreso, subong man sa nagabaligya sang boto, sa tion nga mapamatud-an nga may natabo nga transaksyon sa magtimbang nga bahin.
Mahibaluan, nga para sa mga tagreklamo ukon luyag magpalab-ot sang reklamo may kaangtanan sa vote buying ukon vote selling mahimo ini nga ipalab-ot pinaagi sa pagtawag sa hotline numbers nga naka post sa website sang COMELEC kag mahimo man nga magfill up sang form nga ginahatag sang ahensya kag ipasa sa Committee on Kontra Bigay.
Samtang, ang vote buying ukon vote selling indi lamang makita sa paghatag sang cash, apang makonsiderar man nga isa ka aktibidad sang kaangay buluhaton ang pagpanagtag sang ayuda nga may presensya sang mga kandidato.
