Posible nga magnubo sa 13 ka boto ang kinahanglanon agud ma-convict si Vice President Sara Duterte kon 20 lamang ka senador ang legal nga makapartisipar bilang senator-judges sa tion nga magpagwa sang desisyon ang Impeachment Court.
Ini ang interpretasyon nga ginlatag sang abogado kag professor of Law nga si Howard Calleja, base sa probisyon sang Konstitusyon nga nagakinahanglan sang two-thirds concurrence sang tanan nga miyembro sang Senado agud ma-convict sa impeachment case.
Suno kay Calleja, indi fixed sa 16 ukon 24 ang numero nga gamiton nga basehan sa pagtotal sang two-thirds. Sa baylo, mahimo ini magbag-o depende sa kadamuon sang mga senador nga legal ukon aktuwal nga makaserbisyo bilang senator-judge.
Kon 21 ka senator-judges ang makapartisipar, kinahanglan pa nga madetermine kon 13 ukon 14 ka boto ang equivalent sang two-thirds. Samtang kon 20 ang makapartisipar, ginbanabana ni Calleja nga 13 ka boto ang kinahanglan agud ma-convict.
Ginpahayag ni Calleja nga isa ini ka “moving number” ukon nagabag-o nga numero ang voting threshold bangud wala man ginpat-od sang Konstitusyon ang numero nga 16 ukon 24.
Sa subong, nagapabilin sa 16 ka boto ang conviction threshold, base sa nauna nga ruling sang presiding officer sang Impeachment Court, nga amo man ang panindugan sang House prosecution.
Gin-imbitar naman sang Impeachment Court ang mga anay mahistrado sang Supreme Court agud maghatag sang ila opinyon parte sa pag-interpretar sang constitutional requirement, antes ini pagadiskusyunan sang mga senator-judge ang ginadalahig nga voting threshold.
Ang Impeachment Court ang magadesisyon kon pagapabilinon ang 16-vote threshold ukon magagamit sang lain nga interpretasyon antes mag-abot sa pinal nga botohan ang kaso batok sa bise presidente.
