Ginpasugtan na sang mga otoridad ang mga passenger vessel nga magbyahe.
Ini ang kaadungan sang pag-ayo na sang panyempo sa madamo nga lugar sa pungsod bangud nagguha na ang bagyo nga Enteng kahapon nga adlaw sang Miyerkules.
Suno sa Philippine Ports Authority, wala na sang stranded nga mga pasahero sa mga port partikular na sa Bicol region kag Southern Tagalog kun sa diin ginatos ka pasahero ang inisyal nga naibalita nga naapektuhan matapos pagdumilian ang pagbyahe sa tyempo sang paglaslas sang bagyo.
Sa ginhiwat naman nga inspeksiyon sang Martes sa Batangas port, gin-assign na ni PPA General Manager Jay Daniel Santiago ang tanan nga port managers sa mga apektado nga lugar nga maghiwat sang mga tikang para mabalik ang normal nga operasyon sa ila nga lugar.
Pila sa mga tikang nga ini ang pagsiguro nga tanan nga mga pasilidad kalakip ang libre nga water-refilling kag charging stations ang naga-gana subong man, dapat siguruhon nga yara sa maayo nga kondisyon ang tanan nga comfort rooms.
Sa karon, nagapadayon ang ginahiwat nga assessment sang PPA sa tanan nga pantalan sa pungsod nga may kaangtanan sa posible nga halit nga gintuga sang nag-agi nga bagyo.
