ROXAS CITY – Wala sang bisan pila nga kantidad nga pagabaydan ang mga ginikanan para sa modules sang mga kabataan nga maga-eskwela sa karon nga ‘new normal’ education.
Ini ang ginpahayag ni Dr. Marvic S. Martirez, ang Curriculum Implementation Division (CID) Chief sang Department of Education (DepEd) Roxas City Schools Division sang mainterview sang Bombo Radyo.
Suno diri nga ang pondo para sa pagpa-print sang mga modules ang pagakuhaon sa Maintenance and Other Operating Expenses (MOOE) sang mga eskwelahan.
Magluwas diri suno sa iya magahatag man sang modules ang DepEd Roxas City Division para sa mga eskwelahan.
Suno diri nga posible nga may pila ka mga manunudlo sa pila ka eskwelahan nga nagahatag ukon naga-send sang soft copies sang modules sa mga ginikanan apang wala ini ginapa-print sa ila.
Mahimo nga buksan lamang ini sa ila laptop ukon cellphones kun may ara kag sabton sa papel ang mga questionnaires sa modules.
Apang ginpasiguro sini nga may mga printed modules para sa mga estudyante.
Matandaan nga nagpalab-ot sang reklamo sa Bombo Radyo ang pila ka mga ginikanan sa President Manuel Roxas Memorial Integrated School – South natuhoy sa pag-obligar sa ila nga ipa-print ang gin-send nga modules sang eskwelahan.
Dugang pa nga alegasyon nga sang sila ang nagreklamo, ginhambalan pa sila sang manunudlo nga magpangita na lamang sang iban nga eskwelahan kun indi sila makasarang magpaprint sang modules.
