Wala nakabaton sang ano man nga confidential fund halin sa Department of Education ang unit ni Army Colonel Manaros Boransing II sang termino ni Vice President Sara Duterte bilang secretary sang DepEd para sa pagpatuman sang walo ka mga leadership seminars sa mga probinsya sang Mindanao sang 2023.
Ginpahayag ini ni Boransing kadungan sang ika-20 nga adlaw sang impeachment trial ni Vice President Duterte bilang testigo sang prosecution.
Suno sa iya, nagapatigayon gid man sila sang Youth Leadership Seminar kaupod ang DepEde apang wala siya sang ihibalo kun paano ginabayadan sang ahensya ang gingasto para sa seminar.
Ang DepEd amo ang nagahatg sa military sang impormasyon sa eskwelahan kag schedule sang mga estudyante agud madetermina ang ila availability para sa seminar.
Nahibaluan nga si Boransing ang isa sa mga military officials nga nag-issue sang military certifications sang Enero 2024, sa diin gin-issue ini mataposnagh-request si anay DepEd Undersecretary Michael Poa nga subong amo ang isa sa mga defense counsels sang bise president.
Nagdepensa man si Poa kag ginpahayag nga ang military certifications nga iya ginpangayo ang para sa queries sang state auditor nga nagapangayo sang documentary evidence sa P15.5 million nga balor sang confidential fund spending sang DepEd para sa reward sang informants.
Nagsabat naman si Boransing nga wala siya sang ideya nga ang iya certification ang gin-gamit agud i-justify ang confidential fund spending sang DepEd.
