Dakop ang isa ka wanted nga persona matapos ginserbihan sang warrant of arrest sa Brgy. Nasunugan, Dao Capiz.
Ginkilala ang akusado kay alyas Nonoy, 56-anyos kag residente sang nasambit nga lugar.
Sa impormasyon nga nagikan sa Dao Municipal Police Station, nagapangatubang ang akusado sa kaso nga paglapas sa Sec. 5 in relation to Sec. 6 sang R.A. 9262 ukon Anti-Violence Against Women and Their Children (VAWC) Act of 2004.
Samtang ang warrant of arrest ang ginpapanaog kag ginpirmahan ni Acting Presiding Judge Eric Anthony Dumpilo sang Regional Trial Court, Branch 14, 6th Judicial Region, Roxas City, Capiz nga napetsahan sadtong Oktobre 30, 2024.
Ginrekomendar naman sang korte ang P72,000 nga piyansa para sa temporaryo sini nga kahilwayan.
Sa karon, yara na sa paghinakop sang Dao PNP ang akusado para sa nagakaigo nga disposisyon.
