Gin-atake sang sakit sa tagipusuon ang isa ka watchman nga nasapwan-patay sa Roxas Memorial Provincial Hospital- Lanot, Roxas City.
Ginkilala ang biktima kay alyas “Anthony”, yara sa legal nga pang-edaron kag residente sang Sitio Bliss, Barangay Pantalan, President Roxas, Capiz.
Suno kay PCMS Ramil Arcangeles, spokesperson sang Roxas City PNP, ginpahayag nga may nagpanawag sa ila nga istasyon nga may nasapwan nga lalaki nga wala na sang kabuhi sa amu nga lugar.
Gilayon naman nila ini nga ginpadulungan agud kumpirmahon kun matuod ang panghitabo kag sa ila nga pagtsekyar kaupod ang Roxas City Emergency Response Team, didto kag natukiban nga wala na sang kabuhi ang amu nga persona.
Pahayag pa ni Arcangeles nga wala nakainom sang makahulubog nga ilimnon ang biktima kag wala man sang foul play sa iya kamatayon.
Apang ginapatihan nga gin-ataki ini sa iya sakit nga high blood kag amo ang hinungdanan sa iya kamatayon.
Sa karon, yara na sa isa ka punerarya sa syudad sang Roxas ang bangkay sang nasambit nga biktima.
