Ginpaidalom sang National Grid Corporation of the Philippines ukon NGCP sa red alert status ang Western Visayas bangud sang limitado nga supply sang kuryente halin sa available nga mga planta.
Sa interview sang Bombo Radyo kay Mr. Reagan Alcantara, Lead Specialist sang National Grid Corporation of the Philippines, iya ginpahayag nga ginpaidalom sa amo nga status ang Visayas grid bangud forced outage sang mga planta nga naga-supply sang kuryente.
Ang red alert status sa Visayas epektibo halin alas-4:00 sang hapon tubtob alas-9:00 sang gab-i kag posible magatuga sang rotational power interruptions sa pila ka mga lugar.
Suno kay Alcantara, magluwas man sa red alert status may yara man sang yellow alert status bangud sang manipis nga supply sang kuryente halin alas-3:00 tubtob alas-4:00 sang hapon kag alas-9:00 tubtob alas-11:00 sang gab-i.
Nahibaluan nga ang red alert status ginapatuman kun ang operating margin indi na bastante agud masarangan ang contingency requirement sang transmission grid.
