Temporaryo nga ginpaidalom sa lockdown ang White House matapos nabatian ang sunod-sunod nga lupok malapit nga lugar.
Suno sa U.S. Secret Service, nakabaton sila sang report sang mga lupok malapit sa 17th Street kag Pennsylvania Avenue NW kag gilayon sila nga nagpatigayon sang verification sa mga personnel sa lugar.
Ginabanta 20 tubtub 30 ka lupok ang nabatian mga alas 6 sang gab-i.
Bangod sini, ginmanduan sang US Secret Service agents ang mga journalist nga yara sa North Lawn nga magdalagan pasulod sa press briefing room para sa ila kaluwasan.
Gin-lift man ang lockdown sa White House antes mag-alas 7 sang gab-i matapos ang hugot nga pagbantay sang mga otoridad.
Samtang yara naman sa White House si US President Donald Trump sang natabo ang insidente.
