Ginarekomendar sang Department of Labor and Employment (DOLE) sa mga employer nga magpatuman sang mga tikang para maprotektahan ang ila mga workers sa tuman nga init sang panahon.
Sa Bagong Pilipinas Ngayon, partikular nga ginsuhestyon ni DOLE Bureau of Working Conditions (BWC) Director Alvin Curada ang pag-adjust sang oras sang trabaho ilabi na ang mga workers nga exposed sa direkta nga silak sang adlaw kasubong sang mga yara sa construction industry.
Mas luwas suno diri kun ang oras sang trabaho halin alas 6:00 tubtob alas 11:00 sang aga kag maga-resume sang alas 2:00 tubtob alas 5:00 ukon alas 6:00 sang hapon.
Magluwas diri, ginarekomendar man nga magpatuman sang buddy system kun sa diin may timbang ang kada mamumugon para mabantayan ang kahimtangan sang kada isa.
Ginarekomendar man ang paghatag sang regular nga break kada duha ukon tatlo ka oras para mahatagan sang kahigayunan ang lawas nga makapahuway kag makabawi gikan sa tuman nga init.
