ROXAS CITY – Patay ang driver sang motorsiklo samtang kritikal ang 2 ka backrider sini sang madulaan sang preno kag nagbunggo sa karsada sa Barangay San Esteban, Pilar, Capiz ang motorsiklo.
Nag-angkon sang patal nga pilas sa ulo ang napatay nga biktima nga si Ruzel Moreno 29-anyos sang Purok 1, Barangay Libas, Roxas City, samtang ginabulong sa ospital sanday Felimon Fuentinella 32-anyos kag Jon Bernard de la Cruz 24-anyos sang Arcabalo, Bolo, Roxas City.
Nagaguwa sa imbestigasyon sang pulisya nga magkaupod nga nag-inum ang tatlo ka construction workers matapos ang ila nga trabaho kag pauli na sila sang madulaan sang preno ang motorsiklo kasunod ang pagbunggo sini sa railing.
Bangud sa mabaskog nga impact nagtabog ang tatlo apang nag-igo ang ulo ni Moreno sa semento nga gintunaan sang iya nga kamatayon.
Sa karon nagapadayun ang imbestigasyon sang mga pulis sa nagluntad nga aksidente.
