Indi magnubo sa 10 ka-tawo ang napatay kag pila pa ang mga pilason matapos ang airstrike sang Israel malapit sa isa ka buluthuan nga ginhimo temporaryo nga puluy-an sang mga nag-evacuate nga Palestino sa Gaza Strip sang Lunes.
Suno sa mga health officials, natabo ang pag-atake sa sidlangan sang Maghazi refugee camp kasunod sang kinagamo sa tunga sang mga residente kag isa ka Israeli-backed militia.
Sa tunga sang tensyon, duha ka mga missile halin sa Israeli drones ang nag-igo sa komunidad.
Sa separado nga insidente, may isa pa nga napatay kag isa ka bata ang pilason sa Gaza City, samtang isa pa ang napatay sa pagpangluthang sa central Gaza—nga nagtaas sa kabug-usan nga numero sang mga napatay sa indi magnubo sa 12 sa amo nga adlaw.
Wala pa sang opisyal nga pahayag ang militar sang Israel natuhoy sa mga insidente.
Samtang, padayon ang pagbinasulay sang Israel kag Hamas sa paglapas sa naga-egsister nga ceasefire agreement.
Sandig sa Gaza health ministry, naglab-ot na sa 700 ang napatay humalin sang nag-umpisa ang ceasefire.
