Isa ka 15-anyos nga gunman ang nagpangluthang sa guwa sang isa ka high school sa Turkey, kon sa diin indi magnubo sa 11 ka tawo lakip na ang pila ka mga estudyante nga napilasan.
Tatlo sa mga pilason ang ginapahayag kritikal ang kondisyon kag sa subong yara sa intensive care unit, samtang isa naman ang nakaguwa na sa ospital.
Natabo ang nasambit nga pagpangluthang sa guwa sang isa ka eskwelahan sa distrito sang Turgutlu sa probinsya sang Manisa.
Natukiban nga estudyante sa amo man nga buluthuan ang suspek kag nakuhaan sang CCTV footage ang pag-abot sini nga may bitbit nga armas, subong man ang paghalin sini kasunod sang insidente.
Suno kay Turkish Education Minister Mustafa Ciftci, nakuha sa puluy-an sang iya lolo kag lola ang pusil nga gingamit sang suspek.
Sa subong, gina-imbestigaran sang mga lokal nga otoridad ang insidente, bisan pa nga wala pa mahibaluan ang motibo. Ginalantaw man nila ang posibilidad nga ginpaidalom sa bullying sa eskwelahan ang suspek.
Yara man sa kustodiya sang gobyerno ang ginikanan kag lolo kag lola sang suspek kabahin sang nagapadayon nga imbestigasyon.
Ini na ang ikatlo nga narekord nga insidente sang pagpangluthang sa eskwelahan sa Turkey.
