ROXAS CITY – Ginhatagan sang livelihood assistance gikan sa gobyerno ang 11 tanan ka mga rebel returnees nga anay miyembro sang rebelde nga grupo nga NPA.
Ini ang ginpahayag ni PMAJ Ruby Magallanes, tagpamaba sang Capiz PPO sang ma-interview sang Bombo Radyo.
Suno diri, ang pagsungka sang anay mga rebelde ang resulta sang mas ginpasangkad nga kampanya sang Capiz Police Provincial Office kag Phil. Army batuk sa terorismo.
Kapin P715,000 ang kabilogan nga kantidad nga nabaton sang mga benepisiaryo pinaagi sa programa sang gobyerno nga Enhanced Comprehensive Local Integration Program (E-CLIP) kun sa diin P65,000 ang nabaton sang kada isa sa ila, P15, 000 para sa immediate assistance kag P50,000 para sa livelihood assistance.
Gintambungan ang nasambit nga kahiwatan nanday Vice Governor Mitang Magbanua, PCol. Winston M. De Belen, Provincial Director Capiz PPO, LTC Antonio T. Timbal, Commanding Officer, 12IB, Shiela A. Artillero, PDRMMO Consultant, DILG Prov. Director Ace Azarcon kag iban pa sa Isla Brgy. Lanot Roxas City.
Dugang pa ni Magallanes nga nag-agi sa validation, verification kag assessment ang mga nagsungka nga anay rebelde agud mapamatud-an ang ila nangin kaangtanan sa rebelde nga grupo.
Nagapakita suno diri nga mas mabaskog ang kampanya sang katapo sang otoridad batuk sa terorismo kag ginasiguro sini nga bukas palad ang kapulisan nga mangin kabulig sang mga luyag magbalik sa komunidad kaupod ang ila pamilya kag mabatyagan ang bulig sang gobyerno.
Wala man suno diri sang dapat ikaalarma ang pumuluyo sa mga report nga nagapanaog na sa syudad ang mga miyembro sang rebelde bangud ginamonitor na ini sila sang Phil. Army kag intel operatives sang kapulisan sa suporta man sang CIDG, dugang pa nga na neutralize na ang high profile finance committee.
