DAO CAPIZ – Narekober na sang katapo sang Dao Municipal Police Station ang 15 sa mga laptop nga ginkawat sa sa computer laboratory sa Luis Escutin National High School, Barangay Duyoc, Dao Capiz sang tinalikdan nga semana.
Sa interview sang Bombo Radyo sa hepe sang Dao MPS nga si PCapt. Rian Ampoyos, ginpahayag sini nga ang amu nga mga laptops ang narekober sa banwa sang Panay kag Pontevedra.
Suno kay Ampoyos, pinaagi sa serial number sang laptop natigayon nila ini nga makuha.
Matandaan nga magluwas sa 17 ka mga laptops, nataban man sang wala pa matumod nga kawatan ang 2 ka unit sang tablet PC, kag 6 ka mga bag kung sa diin naglab-ot sa masobra P676, 812.42 ang balor.
Kaangut sini, may ginalantaw na nga person of interest ang mga otoridad kag padayon sa gihapon ang ila pagpatigayon sang maid-id nga imbestigasyon.
Mensahe sang hepe sa iya nasakupan ilabi na sa mga pumuluyo nga magkooperar lamang sa ila agud mauntat na kag mahatagan gilayon sang aksyon ang mga illegal nga aktibidad nga nagakahinabo sa ila banwa.
