Ginkumpirmar sang Department of Justice nga 15 ka mga Philippine National Police personnel ang yara sa karon sa ‘restrictive custody’ angut sa kaso sang nadula nga mga sabungero.
Suno mismo kay Justice Secretary Remulla, ginpaidalom sa amo nga restrictions ang nasambit nga mga police officers agud indi na sila makatuga sang dugang nga halit.
Gin-athag sini nga ang 15 ka mga tinawo sang National Police ang gina-alegar imbolbado sa pagpatay sa mga biktima sang sabungeros nga tubtub karon wala pa makita.
Gani, ginpasalig sini sa departamento ang ila padayon nga imbestigasyon kadungan sang pagpasalig nga indi sila mag-untat tubtub nga mahatagan sang hustisya, ilabi na sa pamilya sang mga sabungero.
Samtang, angut sa witness nga yara sa ila kustodiya nga si alyas ‘Totoy’ ukon Julie ‘Dondon’ Patidongan, ginpaambit ni Department of Justice Secretary Jesus Crispin Remulla nga yara na ini sa kustodiya sang Philippine National Police.
Apang hugot ini nga ginpanginwala sang kampo ni Atong Ang kag dugang nga ginpanindugan nga wala sang kredibilidad ukon basehan ang mga alegasyon nga ginhimo ni alyas ‘Totoy’ angot sa iya.
Gani, bangud sa sini nga mga pagbayluhanay sa tunga sang nagkalain-lain nga kampo, ginpanindugan ni Justice Secretary Remulla nga mapasalig ang publiko nga mahatag ang hustisya.
Ang iya pasalig nga ang ila padayon nga imbestigasyon ang indi maapektuhan ukon madagtaan sang kwarta amo lamang ang pagdeterminar sang kamatuoran.
Bangud sini, liwat nga nakasapo sang paglaum ang mga himata sang mga nadula nga sabangero nga malab-ot nila ang madugay na nila nga ginahulat nga hustisya.
Suno kay Janice Esplana, tiya sang isa sa mga biktima, nalipay sa iya ang mga bag-o nga report bangud suno sa iya nga antes sini halos wala sila sang may nabatian nga progreso angut sa kaso.
Nagalaum naman ang pamilya sang mga nagkaladula nga mga manugbulang nga mahatagan sang hustisya sa labing madali nga panahon
