Magalab-ot sa 150,000 MT sang bugas nagikan sa ila nga buffer stock ang nakatalana nga i-distribute sang National Food Authority sa tion nga dalayon na nga ideklarar sang Department of Agriculture ang national food security emergency.
Suno sa DA, target sang NFA nga ipaguwa ang yara sa 3 million nga 50-kilogram bags sang bugas sa sulod sang anom ka bulan sa mga lugar kun sa diin mataas ang presyo sang bugas.
Plano man sang NFA nga magbakal sang dugang nga supply sang palay sa balor nga P23 kada kilo sa masunod nga bulan.
Igadungan ini sa panahon sang tig-alani nga magasugod sa tunga-tunga sang bulan sang Pebrero.
Kumpyansa si NFA administrator Larry Lacson nga makabulig ang pagpaguwa nila sang stock sang bugas para mapanubo ang presyo sang bugas sa mga balaligyaan sa bug-os nga pungsod.
Mandato naman sang NFA nga i-maintain ang 15-day rice buffer stock nga magahalin naman sa mga patubas sang mga lokal nga mangunguma.
