Ginkumpirma sang National Police Commission (NAPOLCOM) nga 18 ka mga pulis ang ‘involved’ sa kaso sang pagkadula sang 34 ka manugbulang halin 2021 tubtob 2022.
Suno kay NAPOLCOM vice chairperson kag executive officer Atty. Rafael Vicente Calinisan nga ginlakip sa reklamo nga gin-file nanday Julie “Dondon” Patidongan, alyas “Totoy,” kag sang mga pamilya sang mga biktima ang 18 ka pulis kun sa diin 13 sa ila ang aktibo pa sa serbisyo samtang lima ang una na nga nakakas.
Nagpamalibad si Calinisan nga ibuyagyag kun ano kadalom ang pagkaulamid sang mga nasambit nga pulis samtang ginapatigayon pa ang imbestigasyon sa reklamo.
Dugang pa sang natungdan, ipadala sang NAPOLCOM ang mga madnu ukon summons sa mga respondent agud makuha ang ila nga bahin.
Base sa complaint gin-file kahapon, ginpahayag ni Patidongan nga ang mga pulis ang ginaalegar ‘involved’ sa pag-kidnap kag pagsaylo sang mga manugbulang halin sa mga farm padulong sa Taal Lake. Ginapatihan niya nga didto ginlubong ang mga biktima.
Sa karon, 15 ka pulis ang yara idalom sang restrictive custody sa Camp Crame bangud sa ginaalegar pagkaulamid nila sa insidente. Isa sa ila ang natalana nga magretiro, samtang tatlo ang una na nga nakakas sa serbisyo.
Sadtong Enero 2023, pito na ang na-dismiss nga pulis bangud sa pareho nga kaso.
Suno sa mga report sang pulisya, ang pagkadula sang mga manugbulang ang may kaangtanan sa ginapahayag “match fixing” ukon pagpangdaya sa bulang.
Ginatudlo ni Patidongan bilang utak sang krimen ang negosyante nga si Atong Ang, kag gin-angut man sini ang aktres nga si Gretchen Barretto — butang nga hugot nga ginpanginwala sang duha ka personalidad.
Padayon ang imbestigasyon sang NAPOLCOM samtang ginahulat ang mga pahayag sang mga gin-akusaran agud matumod ang masunod nga tikang sa kaso.
