DUMARAO, CAPIZ – Boluntaryo nga ginsungka sa mga otoridad ang duwa ka granada sa Barangay Astorga, Dumarao, Capiz.
Sa nakuha nga impormasyon sang Bombo Radyo nagikan sa Dumarao MPS, boluntaryo nga ginsungka sa ila talatapan sang wala na ginhingadlan nga persona ang 2 ka mga MK2 HE Fragmentation Hand Grenade.
Ang nasambit nga granada ang ginapanag-iyahan sang nagtaliwan nga amay sang surenderee nga anay miyembro sang Philippine Army nga may rangko nga Technical Sergeant kag nagretiro sang 1997.
Mahibaluan nga ini ang bunga sang mas ginpasangkad nga kampanya sang Tokhang Kontra Armas-luthang ukon TKAL sang mga kapulisan agud mapabilin ang kalinong kag katawhay sang palibot.
Samtang, sa bulig man sang mga katapo sang Capiz Provincial EOD and Canine Unit kag Capiz PECU, natigayon nga ginpalupok ang nasambit nga mga granada bangud sang grenade hazard condition kag indi na pwede pa nga ibyahe.
