ROXAS CITY – Dead on the spot ang Grade 12 nga estudyante sang Ivisan National High School kag driver sang motorsiklo samtang ginabulong sa ospital ang duha ka iban pa matapos araruhon sang dump truck ang motorsiklo at tricycle sa Sitio Sayuyan, Barangay Malocloc Norte, Ivisan, Capiz.
Halos matunga ang lawas sang estudyante nga ginkilala kay Evelyn Valderas 23-anyos naga-OJT sa isa ka salon sa Roxas City kag driver sang motorsiklo nga si Jun Abadesco sang Malocloc Norte, Ivisan, Capiz. Padayun man nga ginadapatan sang pagbulong ang duha ka pilason nga sanday Mylene Abadesco, asawa sang napatay nga si Jun kag isa ka bystander na si Antonio Orola.
Sa exclusive interview sang Bombo Radyo Roxas kay Kagawad Connie Ubalubao, ginpahayag sini nga yara sa isa ka lane ang involved nga mga salakyan sang hinali nga nag-overtake ang dump truck nga may karga nga mga bato kag ginamaneho ni Randy Sarito 29-anyos sang Barangay Binuntucan, Pontevedra, Capiz.
Suno pa sa opisyal sang barangay nga hinali nga nadulaan sang preno ang dump truck kag gin-araro sini ang motorsiklo samtang naglumpat naman sa ginasakyan nga tricycle si Valderas matapos makita nga nadulaan sang kontrol sa manubela ang driver sang trak.
Bangud diri, nalapakan sang trak si Valderas samtang nautod naman ang isa ka tiil ni Jun.
Samtang yara na sa kostodiya sang Ivisan Municipal Police Station ang driver sang dump truck matapos nagsungka kasunod sang aksidente.
