ROXAS CITY – Patay ang barangay kagawad-elect matapos ginluthang sa Sitio Magalan, Sagrada Familia, Dumarao, Capiz.
Ginkilala ang biktima kay Raymando Montaño, 44 anyos.
Padayon naman nga ginabulong sa ospital sa Barotac Viejo District ang utod sini nga si Rex Montaño, 30 anyos bangud sa kapilasan nga naangkon sa nasambit nga insidente.
Napatay naman samtang ginabulong sa Don Ramon Tugbang Medical Center si Arnel Putente nga may multiple gunshot wounds.
Ba-se sa imbestigasyon sang mga kapulisan, maggaguha na kuntani sa balay sang iya tiya si Putente nga may bitbit nga armas bangud suno sa iya, una siya nga ginbugnutan sang armas ni Raymando.
Sa karon, nagapadayon pa ang imbestigasyon sang mga kapulisan agud matul-id kun may kahilabtanan sa bag-o lamang nagtakop nga eleksiyon ang natabo nga insidente.
Mahibaluan nga ang napatay nga si Raymando ang nagasuporta sa incumbent punong barangay nga nagdaog sa eleksiyon samtang suportado naman ni Putente ang kasumpong sang nasambit nga incumbent punong barangay.
