ROXAS CITY – Pilason ang duha ka persona matapos ang nagluntad nga aksidente sa dalanon sa Barangay Lawaan, Roxas City.
Ginkilala ang biktima kay Denzell Jane Teodosio, residente sang Brgy. Linabuan Sur Banga Aklan apang temporaryo nga nagapuyo sa syudad sang Roxas.
Samtang ang driver sang motorsiklo ang ginkilala kay Marvin Barroa, 29-anyos residente sang Brgy Daga banwa sang Panay.
Sandig sa imbestigasyon sang Roxas Component City Police Station, samtang ginasubay ni Barroa ang dalan padulong sa syudad sakay sa ginamaneho nga Honda nga motorsiklo wala sini nadiparahan ang pagtabuk sang biktima kag aksidente nga nabungguan ini apang kasunod diri ang pagkatumba sang motorsiklo ni Barroa.
Bangud sa natabo, nag-angkon sang pilas sa magkatuhay nga parte sang lawas si Teodosio kag Barroa kag lunsay ginpadangat sa separado nga ospital para sa nagakaigo nga pagbulong.
Samtang, ginkustudiya sang kapulisan ang nasambit nga motorsiklo para sa nagakaigo nga disposisyon.
