ROXAS CITY – Patay ang 28 anyos nga lalaki matapos nagbitay sa sulod sang ila balay sa Barangay San Pedro, Pilar, Capiz.
Ginkilala ang biktima kay Jomar Balbada, residente sang nasambit man nga lugar.
Base sa inisyal nga imbestigasyon sang Pilar Municipal Police Station, ginkakibot na lamang ni Jack Lord Balbada sang nakit-an ang iya utod nga biktima nga nakabitay na sa ila balayan gamit ang nylon rope kag wala na sang kabuhi.
Mahibaluan nga may ginbilin pa nga suicide note ang biktima kun sa diin ginsulat sini nga indi na niya matakudan ang pagpalamanog sang iya natuo nga butkon.
Nahibaluan dugang may yara sang indi pag-intiendihanay ang biktima kag ang iya kahagugma.
Suno kay Police Corporal Jaypee Tumogda sang Pilar Municipal Police Station, base sa ila nga pagpangusisa nga may isa ka beses nga nagsumbag sa pader ang biktima bangud sang ila indi pag-intiendihanay sang iya kahagugma rason nga nagpalamanog ang iya kamot.
Nasaad sa suicide note sang biktima nga indi na sini luyag pa magastuhan ang iya pamilya sa pagpabulong sa iya kamot.
Nasaad pa sa amo nga sulat nga nagahinyo ini sa iya pamilya nga ilubong ini sa petsa nga Hunyo 19.
Natalana naman nga ipaidalom sa post-mortem examination ang bangkay sang biktima.
